དམིགས་ཡུལ།

༡༽ ༧གོང་ས་མཆོག་གི་ཐུགས་བསྐྱེད་དམ་བཅའ་ལྔའི་དགོངས་བཞེད་བསྒྲུབ་རྒྱུ་གཙོ་བོར་བྱས་པའི་བཀའ་བཞིན་སྒྲུབ་པའི་མཆོད་པས་མཉེས་པའི་སྒོ་ནས་སྐུ་ཚེ་༧ཞབས་པད་བརྟན་པའི་གསོལ་འདེབས་ཞུ་རྒྱུ་དང༌། རང་རེ་བོད་ཀྱི་ན་གཞོན་ཚོས་མགོན་པོ་གང་གི་དགོངས་པར་རྗེས་ཡི་རང་གི་རྒྱབ་སྐྱོར་ཞུ་རྒྱུ།

ཀ)  འགྲོ་བ་མིའི་བཟང་སྤྱོད་དང་སྤྱི་ཡོངས་ཀྱི་རིན་ཐང་གོང་མཐོར་གཏོང་རྒྱུ།

ཁ)  ཆོས་ལུགས་མཛའ་མཐུན་གོང་འཕེལ་གཏོང་རྒྱུ།

ག) བོད་ཀྱི་སྐད་ཡིག་དང་རིག་གཞུང་སྲུང་སྐྱོབ་བྱ་རྒྱུ།

ང) རྒྱ་གར་གྱི་གནའ་རབས་ཀྱི་སེམས་ཁམས་རིག་པའི་ལེགས་བཤད་སླར་གསོ་བྱ་རྒྱུ།

༢༽   བོད་ཀྱི་ན་གཞོན་ཚོའི་ཁྲོད་དུ་སྲོལ་རྒྱུན་དང་དེང་རབས་ཀྱི་བོད་མིའི་ངོ་བོ་དང༌། བོད་ཀྱི་ནང་ཆོས། བོད་ཀྱི་རིག་གཞུང་སྐོར་ཤེས་རྟོགས་གཏིང་ཟབ་ཏུ་གཏོང་རྒྱུ།

༣༽   བཙན་བྱོལ་ནང་གི་ན་གཞོན་ཚོའི་བོད་ཀྱི་རིག་གཞུང་གི་འདུ་ཤེས་བཟང་དུ་གཏོང་རྒྱུ་དང༌། དེ་བཞིན་བོད་དོན་ལས་འགུལ་མུ་མཐུད་རྒྱུན་སྐྱོང་བྱེད་པའི་ཚོར་སྟོབས་ཤུགས་ཆེར་བཏང་སྟེ་ན་གཞོན་སྤྱིའི་གོང་བུ་གཅིག་ཏུ་བསྒྲིལ་རྒྱུར་ཤུགས་སྣོན་རྒྱག་རྒྱུ།

                            ང་ཚོའི་ཁས་ལེན།

        བརྟན་བཞུགས་ཀྱི་མཛད་སྒོར་མཉམ་ཞུགས་གནང་མཁན་ཡོངས་ཀྱིས་༧གོང་ས་མཆོག་གི་ཐུགས་བསྐྱེད་དམ་བཅའ་ལྔའི་ནང་ནས་རང་ཉིད་ཀྱི་ནུས་པ་ལ་དཔག་པའི་ཞབས་འདེགས་གང་ཞུ་ཐུབ་མིན་བསམ་གཞིགས་དགོས་རྒྱུ། ཁས་ལེན་གྱི་དམ་བཅའ་ནི་རང་གི་མོས་པ་ཡིན་པས་༧གོང་ས་མཆོག་གི་དྲུང་ནས་ཁས་ལེན་དམ་བཅའ་ཕུལ་མཁན་ཡིན་ན་བཅོས་མ་མིན་པའི་ལྷག་བསམ་རྣམ་པར་དག་པ་དགོས་པར་བརྟེན་བླ་སློབ་ཀྱི་དམ་ཚིག་ལ་བསམ་གཞིགས་ནན་ཏན་དགོས་པ་ཡིན།

           གཤམ་དུ་ཁས་ལེན་གྱི་དཔེ་མཚོན་འགའ་བཀོད་ཡོད། འདི་དག་ནི་དཔེ་མཚོན་ཙམ་ལ་བརྟེན་ན་གཞོན་བརྟན་བཞུགས་དགྱེས་འཛོམས་ལ་བཅར་མཁན་ཚོས་ཁས་ལེན་གནང་སྐབས་ཀུན་སློང་རྣམ་དག་དང་། ངོ་ལྐོག་མེད་པར་ཕྱི་གཙང་ནང་གཙང་དགོས་པ་ཧ་ཅང་གལ་ཆེ་ཡིན།