ང་ཚོའི་སྐོར།

བོད་ཀྱི་ན་གཞོན་རྣམས་ཀྱིས་ཕྱི་ལོ་ ༢༠༢༥ ཟླ་ ༩ ཚེས་ ༡༠ ཉིན་༧གོང་ས་མཆོག་ལ་བོད་ཀྱི་ལོ་རྒྱུས་ཐོག་ཐེངས་དང་པོ་ཡིན་པའི་ན་གཞོན་མི་རབས་ཐུན་མོང་གི་བརྟན་བཞུགས་འབུལ་རྒྱུ་ཡིན་ལ། ཐེངས་འདིའི་བརྟན་བཞུགས་ཐོག་འཛམ་གླིང་ས་ཕྱོགས་གང་སར་གནས་པའི་བོད་རིགས་ན་གཞོན་རང་ལོ་ ༡༨ ནས་ ༤༥ བར་གང་མང་མཉམ་འཛོམས་ཀྱི་གོ་སྐབས་རྩ་ཆེ་ཞིག་ཡོང་རྒྱུ་ཡིན་ལ། རང་ཅག་ཐམས་ཅད་ཤིན་ཏུ་སྐལ་པ་བཟང་པོར་འགྱུར་རྒྱུ་ཡིན། ༧གོང་ས་མཆོག་གི་མཚན་དང་། མཛད་འཕྲིན། བཀའ་སློབ་བཅས་ནི་ཡངས་པའི་འཇིག་རྟེན་འདིའི་ཐོག་རང་རེ་བོད་དང་བོད་མིའི་མཚོན་དོན་གཅིག་ཉིད་དུ་གྱུར་བ་ཡོངས་གྲགས་ཡིན་ལ། ༧གོང་ས་མཆོག་གི་དབུ་ཁྲིད་འོག་དར་རྒྱས་བྱུང་བའི་རང་རེའི་ཆོས་དང་རིག་གཞུང་ནི་འཛམ་གླིང་གི་གཅེས་ནོར་དུ་གྱུར་པ་ཡང་དེང་ཡོངས་གྲགས་རེད། བོད་ཀྱི་ནང་བསྟན་ལས་བྱུང་བའི་ལྟ་གྲུབ་དང་། དེ་ལས་བྱུང་བའི་རིག་གཞུང་ཁག་མི་ཉམས་རྒྱུན་འཛིན་བྱ་རྒྱུ་ནི་བོད་དང་བོད་མིའི་ཁེ་ཕན་ཙམ་དུ་མ་ཟད། འགྲོ་བ་མིའི་གཞི་རྩའི་རིན་ཐང་གོང་འཕེལ་དང༌། འཛམ་གླིང་ཞི་བདེ། འགྲོ་བ་ཡོངས་བདེ་སྐྱིད་ལྡན་པའི་འཛམ་གླིང་ཞིག་འཛུགས་བསྐྲུན་བྱ་རྒྱུར་དགེ་ཕན་ཆེན་པོ་ལྡན་ཡོད། ༧གོང་ས་མཆོག་དང་བོད་ཀྱི་ཆོས་དང་རིག་གཞུང་ནི་རང་རེ་བོད་རང་དབང་འཐབ་རྩོད་ཀྱི་རྩ་ཆེའི་ཁོར་ཡུག་ནང་བོད་མི་ཡོངས་མཐུན་སྒྲིལ་དང་། སྟོབས་ཤུགས་ཇེ་ཟབ་ཏུ་གཏོང་བར་བླ་སྲོག་ལྟ་བུའི་ནུས་སྟོབས་གལ་ཆེར་གྱུར་ཡོད།

ང་ཚོ་གཞོན་སྐྱེས་ཀྱི་བརྟན་བཞུགས་གོ་སྒྲིག་ཚོགས་ཆུང་ནང་ད་ལྟའི་ཆར་གཙོ་འགན་ལེན་མཁན་གྱི་ཚོགས་མི་ ༡༣ ཡོད་པ་དང༌། དེ་ཚོ་ནི་ན་གཞོན་ཡིན་ལ། ད་ཕན་སྤྱི་ཚོགས་ཀྱི་འགོ་ཁྲིད་དང་། སྤྱི་ཚོགས་ཁྲོད་ཐོན་པའི་ཆེད་ལས་པ་འདྲ་མིན་གྱི་སྐུ་ཚབ་ཡིན། བརྟན་བཞུགས་གོ་སྒྲིག་ཚོགས་ཆུང་གི་ཚོགས་མི་ཁག་ནི་བོད་མིའི་སྤྱི་ཚོགས་ཁྲོད་ཀྱི་ཤེས་མྱོང་ལྡན་པའི་གཞོན་སྐྱེས་ཀྱི་ངོ་བོ་མཚོན་པ་ལས། སྲིད་དོན་གྱི་ངོ་བོ་ལྡན་པའི་གཞན་གྱི་ཆབ་སྲིད་ཀྱི་རྒྱབ་ལྗོངས་གང་ཡང་མེད་ལ། དེ་མིན་ཕྱོགས་གཏོགས་ཀྱི་ངོ་བོ་མཚོན་པའི་ཚོགས་པ་ཡང་གཏན་ནས་མིན་པ་གསལ་པོ་བཟོ་རྒྱུ་ཡིན། ང་ཚོ་གཞོན་སྐྱེས་བརྟན་བཞུགས་གོ་སྒྲིག་ཚོགས་ཆུང་གི་ལས་འགན་གཙོ་བོ་ནི་ཕྱི་ལོ་ ༢༠༢༥ ལོ་ནི་བོད་གཞུང་མང་ནས་གོ་སྟོན་གྱི་བཀའ་དྲིན་རྗེས་དྲན་ཞུ་བའི་སྐལ་བཟང་གི་དུས་ཁྱད་པར་ཅན་ཡིན་པར་བརྟེན་གོ་སྐབས་འདི་བརྒྱུད་བོད་རང་དབང་འཐབ་རྩོད་ཀྱི་གལ་ཆེའི་འཕོ་འགྱུར་གྱི་སྐབས་འདིར་རང་རེ་ན་གཞོན་ཐུན་མོང་ནས་རང་རང་གི་ལས་གནས་ཁག་ཏུ་ལས་འགན་འཁྱེར་ཏེ་འབད་འཐབ་བྱེད་པའི་སེམས་ཤུགས་དང་། བློ་གྲོས། ལྷག་བསམ། སྙིང་སྟོབས་བཅས་པའི་དགེ་བའི་འབྲས་བུ་འཁྱེར་ཏེ་༧གོང་ས་མཆོག་ལ་བོད་ཀྱི་མི་རབས་གསར་པ་ཐུན་མོང་ནས་བརྟན་བཞུགས་གསོལ་འདེབས་དང་། རང་རེ་མི་རབས་གསར་པའི་ལས་འགན་དང་བློ་གྲོས་ཐད་མགོན་པོ་གང་གི་བཀའ་སློབ་དང་ལམ་སྟོན་ཞུས་ཏེ་བོད་དང་བོད་མི་མང་ནས་ང་ཚོར་གནང་བའི་ལོ་རྒྱུས་ཀྱི་ལས་འགན་ཆེན་པོ་ཁག་གང་མྱུར་མངོན་འགྱུར་ཡོང་བར་ཆོད་སེམས་བརྟན་པར་བཟུང་སྟེ་རྒྱལ་བ་དགྱེས་པའི་མཆོད་སྤྲིན་ལམ་ནས་མགོན་པོ་གང་ཉིད་སྐུ་ཚེ་བསྐལ་བརྒྱར་བརྟན་པའི་སྲི་ཞུ་བསྒྲུབ་རྒྱུ་དང། རང་རེའི་སྤྱི་བྱེའི་བསམ་འདུན་མ་ལུས་པ་འགྲུབ་རྒྱུར་ཆོད་སེམས་བརྟན་པོས་ཕྱོགས་ཡོངས་ནས་འབད་བརྩོན་ཞུ་རྒྱུ་དེ་ཡིན། བརྟན་བཞུགས་ནང་མཉམ་ཞུགས་བྱེད་མཁན་སྐྱ་སེར་ཁྱད་མེད་བོད་རིགས་ན་གཞོན་རང་ལོ་ ༡༨ ནས་ ༤༥ བར་སོན་པ་ཡོངས་ལ་ཁྱབ་པ་ཡིན།

ང་ཚོའི་རིན་ཐང༌།

ཡོངས་ཁྱབ། – ང་ཚོ་བརྟན་བཞུགས་གོ་སྒྲིག་ཚོགས་ཆུང་ནས་བོད་མི་རང་ལོ་ ༡༨ ནས་ ༤༥ བར་སེར་སྐྱ་ཕོ་མོ་དབྱེར་མེད་ཚང་མ་བརྟན་བཞུགས་ཀྱི་དགའ་འཛོམས་ཆེན་མོ་འདིར་མཉམ་ཞུགས་གནང་རྒྱུར་མགྲོན་འབོད་དང་དགའ་བསུ་ཞུ་རྒྱུ་ཡིན། ལས་རིམ་འདི་ནི་གཙོ་བོ་ཆོས་ཕྱོགས་དང་འབྲེལ་བའི་ལས་རིམ་རྩ་ཆེ་ཞིག་ཡིན་ལ། བརྩེ་སེམས་དང་། འཆམ་མཐུན། བློ་གྲོས། ནུས་པ་མཉམ་སྤུངས་བཅས་ཀྱི་ན་གཞོན་མི་རབས་གསར་པའི་དགའ་འཛོམས་རྩ་ཆེ་ཞིག་ཀྱང་ཡིན།

གཅིག་གྱུར། – བརྟན་བཞུགས་འདིར་སྤྱི་ཚོགས་དང་། སེར་སྐྱ། ཆོས་ལུགས། ཆོལ་ཁ། ཕ་མོ། ཕྱི་ནང་། ལས་རིགས། རྒྱབ་ལྗོངས་སོགས་གང་ཡང་དབྱེ་བ་མེད་པར་རང་དབང་དང་། དགའ་མོས། བརྩེ་སེམས། དམ་ཚིག་ལ་རྒྱ་བཅས་པ་གཅིག་ཏུ་བསྡུས་པའི་བོད་མི་ན་གཞོན་མི་རབས་གསར་པའི་གཟུགས་བརྙན་ལྡན་པའི་ན་གཞོན་ཐུན་མོང་ནས་རྒྱལ་བའི་བཀའ་དྲིན་རྗེས་སུ་དྲན་པའི་སྒོ་ནས་དམ་ཚིག་གཙང་མའི་བརྟན་བཞུགས་བསྟར་འབུལ་དང་བཀྲ་ཤིས་པའི་དགའ་འཛོམས་ཤིག་ཡིན།

སློབ་གསོ།   –  བརྟན་བཞུགས་ཀྱི་སྐལ་བཟང་གོ་སྐབས་འདི་བརྒྱུད་བོད་མི་ན་གཞོན་ཚོར་བོད་ཀྱི་ཆོས་དང་། རིག་གཞུང་། ཁྱད་པར་འབྲེལ་ཡོད་༧མཆོག་གི་ཐུགས་སྐྱེད་དམ་བཅའ་ལྔའི་སྐོར་ནས་གོ་རྟོགས་གོང་སྤེལ་གྱི་གོ་སྐབས་རྩ་ཆེ་ཞིག་བསྐྲུན་རྒྱུར་ཤུགས་སྣོན་དང་། ན་གཞོན་ཕན་ཚུན་བར་བདེ་སྡུག་གི་ཉམས་མྱོང་སྤེལ་རེས་ཀྱི་སྲི་ཞུ་གོང་སྤེལ། ན་གཞོན་ཕན་ཚུན་འབྲེལ་འདྲིས་གཏིང་ཟབ་དུ་གཏོང་རྒྱུ་བཅས་སུ་འབད་བརྩོན་ཞུ་རྒྱུ་ཡིན།

ཁོར་ཡུག་གཅེས་སྐྱོང༌། –  བརྟན་བཞུགས་དང་བོད་ཀྱི་ན་གཞོན་དགའ་འཛོམས་དུས་སྟོན་གྱི་ལས་དོན་ལག་བསྟར་སྐབས་ཁོར་ཡུག་གི་ཤུགས་རྐྱེན་ལ་བསམ་གཞིགས་བྱེད་རྒྱུ་ཡིན།

                            སློབ་སྟོན་པ་གོ་སྒྲིག།

               བརྟན་བཞུགས་ཆེད་སློབ་སྟོན་པ་ཚོས་གཞོན་སྐྱེས་བརྟན་བཞུགས་གོ་སྒྲིག་ཚོགས་ཆུང་ལ་བརྟན་བཞུགས་འཆར་འགོད་དང་། ལག་བསྟར་སོགས་སྦྱོར་དངོས་རྗེས་གསུམ་གྱི་ལས་དོན་ཐོག་བློ་གྲོས་ལྡན་པའི་ལམ་སྟོན་དང༌། དགོངས་འཆར། རྒྱབ་སྐྱོར་བཅས་གནང་རྒྱུའི་ལས་འགན་ཡོད།

                        སློབ་སྟོན་པའི་ཁོངས་མི།

༡༽  སྐུའི་གསུང་བསྒྱུར་བ།  མཁས་དབང་ཐུབ་བསྟན་སྦྱིན་པ།

༢༽  སྐུའི་གསུང་བསྒྱུར་བ་ཟུར་བ།  དགེ་བཤེས་ལྷག་རྡོར།

༣༽   དགེ་བཤེས་མ་ཀུན་གསལ།