ན་གཞོན་དུས་སྟོན།

བོད་ཀྱི་ན་གཞོན་དུས་སྟོན་འདི་ནི་འཛམ་གླིང་ཡུལ་གྲུ་གང་སར་ཡོད་པའི་བོད་ཀྱི་གཞོན་སྐྱེས་ཐུན་མོང་ནས་གོ་སྟོན་གྱི་བརྟན་བཞུགས་བསྟར་འབུལ་གྱི་སྐལ་བཟང་སྲི་ཞུའི་ཆ་ཤས་སུ་བཀོད་སྒྲིག་ཞུས་པའི་ལས་རིམ་ཞིག་ཡིན།

ན་གཞོན་དུས་སྟོན་འདིའི་རྩ་བའི་འབོད་ཚིག་ནི་གསུམ་སྟེ། དམ་ཚིག་དང་གླེང་མོལ། དགའ་འཛོམས་བཅས་གཙོ་གནད་སྲི་ཞུ་གསུམ་གྱི་ཐོག་ནས་གཞོན་སྐྱེས་ཀྱི་དགའ་སྟོན་འདུ་འཛོམས་འདི་ཚོགས་རྒྱུ་ཡིན།

དུས་སྟོན་འདིའི་དམིགས་ཡུལ་གཙོ་བོ་ནི་བརྟན་བཞུགས་ཀྱི་རྟེན་འབྲེལ་གཞིར་བཞག་ཐོག་༧གོང་ས་མཆོག་དང་བོད་ཀྱི་གཞོན་སྐྱེས་མི་རབས་གསར་པའི་བར་དད་དམ་གཡོ་བ་མེད་པའི་འབྲེལ་བ་སྲ་བརྟན་དང་། ངེད་ཅག་གཞོན་སྐྱེས་ཚོའི་ངོས་ནས་༧གོང་ས་མཆོག་གི་རླབས་ཆེན་གྱི་ཐུགས་དགོངས་ཐད་སྤྱི་སྒེར་གང་རུང་ཐོག་ནས་འབད་བརྩོན་བྱ་རྒྱུ་དང་། དེ་བཞིན་ན་གཞོན་ཕན་ཚུན་དབར་རང་ཅག་བོད་མི་རིགས་ཀྱི་ངོ་བོ་དང་ཐུན་མོང་མ་ཡིན་པའི་རིག་གཞུང་། མི་རིགས་ཀྱི་གོམས་སྲོལ་བཟང་པོ་བཅས་ལ་གཅེས་འཛིན་དང་ཡར་རྒྱས་ཀྱི་འདུ་ཤེས་ངང་གཏིང་ཟབ་གཏང་རྒྱུའི་དམ་ཚིག་གི་ལ་རྒྱ་བརྟན་པོ་འཛུགས་རྒྱུ་བཅས་ལ་འབད་པ་ཡོད་རྒུ་ཞུ་རྒྱུ་དེ་ཡིན།

ང་ཚོས་སྐལ་བཟང་གི་དུས་སྟོན་འདིའི་བརྒྱུད་གཞོན་སྐྱེས་ངོས་ནས་བོད་མིའི་སྤྱི་ཚོགས་སུ་གསར་གཏོད་དང་ཡར་རྒྱས་ཆེད་ཕན་ཚུན་གླེང་མོལ་དང་། ཤེས་རྟོགས། མཉམ་ལས་ཀྱི་འདུ་ཤེས་གོང་འཕེལ་གཏོང་རྒྱུར་གཤམ་གྱི་ལས་རིམ་ཁག་བཀོད་སྒྲིག་ཞུ་ཡོད་པ་དེའི་ནང་ཤེས་ཡོན་པ་དང་ཆེད་ལས་པའི་ལམ་སྟོན་དང་གསུང་བཤད། སྤྱི་ཚོགས་དང་ཆབ་སྲིད། རིག་གཞུང་དང་འབྲེལ་བའི་བརྗོད་གཞིའི་ཐོག་བགྲོ་གླེང་། རིག་གཞུང་དང་སྒྱུ་རྩལ་འགྲེམས་སྟོན། རོལ་དབྱངས་དང་གླུ་གར། ལག་ཤེས་དང་ཚོང་ལས། སྲོལ་རྒྱུན་གྱི་རྩེད་རིགས་སོགས་གོ་སྒྲིག་ཞུ་ཡོད།

ང་ཚོས་དུས་སྟོན་གྱི་ལས་རིམ་འདི་དག་བརྒྱུད་གཞོན་སྐྱེས་མི་རབས་གསར་པ་ཚོས་བོད་ཀྱི་ངོ་བོ་དང་རིག་གཞུང་ལ་དགའ་བཞིན་གཅེས་པར་འཛིན་པའི་བློ་གྲོས་དང་སྙིང་སྟོབས་སྤེལ་ཐབས་དང་། མི་རེ་ངོ་རེར་མི་རིགས་ཀྱི་ལ་རྒྱ་དང་ཕན་ཚུན་དབར་ལ་མཛའ་བརྩེ་དང་བསམ་ཤེས་ཐོག མཐུན་སྒྲིལ་གྱི་གཞི་རྟེན་གསར་པ་ཞིག་འཛུགས་ཐབས་བྱ་རྒྱུ་ཡིན་ནོ།

ཕྱི་ལོ་ ༢༠༢༥ ཟླ་ ༩ ཚེས་ ༡༡ ནས་ ༡༣ བར་ཉིན་དུས་སྟོན་དེ་བཞིན་དྷ་རམ་ས་ལར་ཚོགས་གཏན་འཁེལ་ཡོད། 

དུས་སྟོན་དང་འབྲེལ་བའི་མཛད་རིམ་ཁག་རིམ་པས་གསལ་བསྒྲགས་ཡོང་རྒྱུ་ཡིནཔས་ཚང་མས་མུ་མཐུད་ཐུགས་སྣང་ཡོད་པ་ཞུ།།