བརྟན་བཞུགས་ཞེས་པའི་དོན་གང་ཡིན་ནམ།

༄༅།། བརྟན་བཞུགས་ཞེས་པ་ནི་གཙོ་བོ་ཆོས་ཕྱོགས་ཀྱི་བྱེད་སྒོ་གལ་ཆེ་ཞིག་ཡིན།  དེའི་ནང་དོན་གཙོ་བོ་ནི་རང་གི་དྲིན་ཅན་རྩ་བའི་བླ་མའི་སྐུ་ཚེ་ཡུན་རིང་བརྟན་པའི་ཆེད་དུ་ཆོས་ཕྱོགས་ནས་བླ་མ་རྒྱལ་བ་སྲས་དང་བཅས་པར་གསོལ་བ་སྨོན་ལམ་དང་། རྗེས་འཇུག་སློབ་མ་རྣམས་ནས་རང་གི་བླ་མར་ཕྱིའི་འབུལ་བ་ལྟ་བུའི་མཆོད་པ་གང་ཡོད་འབུལ་བ་དང་། གལ་ཆེ་བ་ནི་རང་གི་དྲིན་ཅན་རྩ་བའི་བླ་མས་རྒྱུན་ལྡན་བྱམས་པ་དང་། བརྩེ་བ། གཞན་ཕན།   ལྷག་བསམ་ལྟ་བུའི་རང་ཅག་གི་ཚེ་འདི་དང་ཕྱི་མའི་མདུན་ལམ་ཆེད་ལམ་སྟོན་གནང་བ་ཁག་རང་གི་ལག་བསྟར་བྱས་པའི་གྲུབ་འབྲས་ཁག་བླ་མར་ཕུལ་ཞིང་།  སླད་ཀྱང་བླ་མའི་དགོངས་པ་ལྟར་གཞན་ཕན་གྱི་ལས་དོན་གང་ཐུབ་བསྒྲུབ་རྒྱུའི་དམ་བཅའ་འབུལ་བར་བརྟན་བཞུགས་ཞེས་ཞུ། ཆོས་ཕྱོགས་ཀྱི་བྱེད་སྒོ་དེ་རིགས་བརྒྱུད་སློབ་མ་རྣམས་ཀྱིས་བླ་མའི་དགོངས་པ་སྒྲུབ་ཐུབ་ཚེ་བླ་མ་ཐུགས་དགྱེས་པོ་ཡོང་བར་བརྟེན་བླ་མ་སྐུ་ཚེ་བརྟན་རྒྱུར་ཕན་ཐོགས་ཡོད་པ་དང་།  སློབ་མར་མཚོན་ན་རང་གིས་བླ་མའི་བཀའ་སྒྲུབ་ཐུབ་པའི་གྲུབ་འབྲས་ལ་དགའ་སྤོབས་སྐྱེ་ཞིང་། ཕྱིན་ཆད་ཀྱང་སེམས་ཤུགས་འཕེལ་རྒྱུར་ཕན་པ་ཡོད་པར་བརྟེན་བླ་མ་དང་སློབ་མའི་བར་བརྩེ་སེམས་དང། ཡོད་ཆེས། འབྲེལ་བ་བཅས་གཏིང་ཟབ་ཏུ་འགྲོ་རྒྱུ་ཡིན་པས་དམ་ཚིག་གཙང་མའི་འབྲེལ་བ་བཟང་དུ་འགྲོ་ངེས་ཡིན་པར་བརྟེན་བླ་མ་ཐུགས་དགྱེས་པའི་བརྟན་བཞུགས་དང་རང་གཞན་བསོད་ནམས་གསོག་པའི་རྟེན་འབྲེལ་དེ་བྱུང་བ་ཡིན།

                བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ནི་རང་རེ་བོད་ཀྱི་ལྷ་སྐལ་འཕགས་མཆོག་སྤྱན་རས་གཟིགས་ཀྱི་རྣམ་སྤྲུལ་ཡིན་པར་མ་ཟད།  རང་རེ་བོད་དང་བོད་མིའི་ཆེད་དུ་མིའི་གཟུགས་སུ་སྐུའི་སྐྱེ་བ་བཞེས་པ་དང་།  དངོས་ཡོད་གནས་ཚུལ་ལ་བོད་མི་ཞིག་ཡིན་ཚེ་སྔར་དུས་རབས་མང་པོའི་གོང་ནས་དུས་དེ་རིང་བར་༧གོང་ས་མཆོག་སྐུ་འཕྲེང་རིམ་བྱོན་གྱི་མཚན་དང་བཀའ་དྲིན་འོག་བོད་འཚོ་གནས་དང་འཕེལ་རྒྱས་བྱུང་བ་དང་། བོད་མི་ནང་པ་ཞིག་ལ་མཚོན་ན་ཁོང་གི་དྲུང་ནས་གསུང་ཆོས་དང་བཀའ་སློབ་མ་ཞུ་མཁན་མེད་པས་༧གོང་ས་མཆོག་ནི་བོད་མི་ནང་པ་ཚོར་རང་གི་དྲིན་ཅན་རྩ་བའི་བླ་མ་ཡིན་ལ།  ནང་པ་མིན་ཡང་ཁོང་ནི་རང་རེ་བོད་མིའི་ལམ་སྟོན་པ་དང་དབུ་ཁྲིད་བླ་ན་མེད་པར་གྱུར་ཏེ་རྣམ་ཀུན་བོད་མིའི་སྤྱི་ཚོགས་ཕྱོགས་གང་ས་མགོན་པོ་གང་གི་དྲུང་ནས་ཆོས་དང་ལམ་སྟོན་ཞུ་བ་དང་།དེ་དག་གི་བཀའ་དྲིན་གསབ་པའི་སླད་རང་རང་གི་མཆོད་པ་དང་བརྟན་བཞུགས་མང་པོ་ཕུལ་གྱི་ཡོད།  རང་རེའི་ཆོས་ལུགས་ཀྱི་བརྟན་བཞུགས་ཀྱི་སྐབས་སུ་ཆོ་ག་འདྲ་མིན་དང་།  ཡིད་དམ་ལྷའི་དཀྱིལ་འཁོར་སྣ་ཚོགས། སྐུ་གསུང་ཐུགས་རྟེན། བཀྲ་ཤིས་རྟགས་བརྒྱད་སོགས་མཆོད་རྫས་ཁྱད་པར་ཅན་སྣ་ཚོགས། དེ་བཞིན་འབུལ་བའི་དངུལ་དངོས་ཆེ་ཆུང་སྣ་ཚོགས་ཕུལ་སྲོལ་ཡོད་པ་ནི་བརྟན་བཞུགས་འབུལ་མཁན་ཚོ་བསོད་ནམས་གསོག་ལ།   རང་གཞན་བསོད་ནམས་གསོག་ཅིང་རྟེན་འབྲེལ་མཚོན་པའི་ཕན་པ་རྒྱ་ཆེ་ཡོད།   བརྟན་བཞུགས་དགོས་དོན་གཙོ་བོ་ནི་དྲིན་ཅན་རྩ་བའི་བླ་མས་རྣམ་ཀུན་བླང་དོར་གྱི་ལམ་སྟོན་གནང་བ་ཁག་བཀའ་བཞིན་འགྲུབ་སྟེ་བླ་མ་མཉེས་པའི་གྲུབ་པའི་མཆོད་པ་འབུལ་རྒྱུ་དེ་ནི་མཆོད་པའི་མཆོག་དང་།  དམ་ཚིག་གཙང་མའི་བརྟན་བཞུགས་ངོ་མར་འགྱུར་གྱི་ཡོད།