དྲིས་ལན།

གོ་སྒྲིག་ཚོགས་ཆུང་ཇི་ལྟར་བྱས་ཏེ་བཙུགས་པ་ཡིན་ནམ།

ང་ཚོ་གོ་སྒྲིག་ཚོགས་ཆུང་འདི་ནི་རང་མོས་ཀྱིས་མཉམ་འདུས་བྱས་པ་ཞིག་ལས།  སྲོལ་རྒྱུན་རང་བཞིན་གྱི་ལམ་ལུགས་ཤིག་ལ་གཞི་བཅོལ་བ་ཞིག་མིན། ན་གཞོན་བརྟན་བཞུགས་ཀྱི་བསམ་བློ་དེ་ནི། ལོ་ངོ་གསུམ་གྱི་སྔོན་དུ། བོད་དོན་ཚོགས་པ་ཁག་གི་འདུ་འཛོམས་ཤིག་གི་ཐོག་ཏུ་གཞོན་སྐྱེས་ཚོགས་མི་ཞིག་གིས་ན་གཞོན་ཚོགས་པ་ཁག་ལ་གཞོན་སྐྱེས་རྣམས་འདུ་འཛོམས་ཀྱིས་འགན་ཁུར་བླངས་ཏེ་༧གོང་ས་མཆོག་ལ་བརྟན་བཞུགས་ཤིག་འབུལ་ཐབས་ལ་འབད་བརྩོན་བྱེད་དགོས་པའི་བསམ་ཚུལ་ཞིག་བྱུང་བ་གཞིར་རྩར་བཟུང་སྟེ་ད་ཆ་བསམ་ཚུལ་དེ་དངོས་སུ་འཛམ་གླིང་གི་ས་ཕྱོགས་གང་སར་གནས་པའིི་བོད་ཀྱི་གཞོན་སྐྱེས་ཁག་ཅིག་གིས་མཉམ་རུབ་ཀྱི་ཐོག་ནས་གཞོན་སྐྱེས་ཀྱི་བརྟན་བཞུགས་འབུལ་རྒྱུ་དངོས་སུ་མངོན་འགྱུར་འབྱུང་བཞིན་ཡོད།

 དུས་དེ་རིང་གི་བར་དུ། བོད་ཀྱི་གཞོན་སྐྱེས་ཚོགས་པ་གང་གིས་ཀྱང་༧གོང་ས་མཆོག་ལ་གཞོན་སྐྱེས་ཀྱི་བརྟན་བཞུགས་ཕུལ་བ་བྱུང་མྱོང་མེད་སྟབས། འདི་ལོ་༧གོང་ས་མཆོག་དགུང་ལོ་ ༩༠ ཕེབས་པའི་སྐུའི་འཁྲུངས་སྐར་དང་སྟབས་བསྟུན་ནས་བོད་ཀྱི་གཞོན་སྐྱེས་རྣམས་ཀྱིས་༧གོང་ས་མཆོག་གི་སྐུ་ཚེ་ཧྲིལ་བོའི་རིང་གི་རླབས་ཆེན་གྱི་མཛད་འཆར་ཁག་ལ་བཀའ་དྲིན་རྗེས་དྲན་མཚོན་ཐབས་དང་། དེ་བཞིན་ཁོང་གི་བཀའ་སློབ་རྣམས་ལག་བསྟར་ཞུ་རྒྱུས་མཚོན་སྐུ་ཚེ་ཞབས་པད་བརྟན་པའི་སྨོན་ལམ་བཅས་ཞུ་རྒྱུའི་གོ་སྐབས་བཟང་པོ་དང་དུས་ལ་བབས་པ་ཞིག་ཏུ་ངོས་འཛིན་བྱས་པའི་ཐོག ང་ཚོས་བརྟན་བཞུགས་འདི་བོད་ཀྱི་ཆོ་ག་ཕྱག་ལེན་དམིགས་བསལ་བ་ཞིག་གི་ཐོག་ནས་ན་གཞོན་ཚོར་འབྲེལ་བ་དང་ལས་འགུལ་སྤེལ་བའི་གོ་སྐབས་ཤིག་ཏུའང་ངོས་འཛིན་བྱས་ཏེ། ༸གོང་ས་མཆོག་གི་འགྲོ་བ་མིའི་བཟང་སྤྱོད་ཀྱི་རིན་ཐང་གོང་མཐོར་གཏོང་བ་དང་། བོད་ཀྱི་ཐུན་མོང་མ་ཡིན་པའི་རིག་གཞུང་སྲུང་སྐྱོབ། དེ་བཞིན་བོད་དོན་གོང་འཕེལ་གཏོང་བ་བཅས་ཀྱི་མཛད་པ་རྣམས་མུ་མཐུད་སྐྱོང་རྒྱུའི་དམ་བཅའ་དང་ཁས་ལེན་ཞུ་རྒྱུར་དམིགས་པ་ཞིག་ཡིན།

ང་ཚོས་ཐོག་མར་གོ་སྒྲིག་ཚོགས་ཆུང་གི་ལས་རིམ་ཁག་ནང་ཁུལ་བགྲོ་གླེང་ལམ་ནས་འཚོལ་རྒྱུའི་རེ་བ་བྱས་ཀྱང་། འགོ་ཁྲིད་དང་ལས་མི་གསར་བསྡུ་བྱེད་པའི་སྒྲོམ་གཞི་མེད་པར་དེ་ལྟར་བྱེད་ཐབས་བྱུང་མེད། དེར་བརྟེན་ང་ཚོས་བོད་ཀྱི་ན་གཞོན་ཚོགས་པ་ཆེ་ཁག་དང་། བོད་མིའི་སྤྱི་ཚོགས་ཀྱི་ཚོགས་སྡེ་ཆེ་ཁག་གི་སྐུ་ཚབ། ས་གནས་འདྲ་མིན་གྱི་རྒྱབ་ལྗོངས་ལྡན་ཞིང་བརྟན་བཞུགས་ཀྱི་ལས་དོན་ཐོག་ཉམས་མྱོང་དང་། ནུས་པ། འབྲེལ་ལམ་ཡོད་པའི་མི་སྒེར་བཅས་པ་གདན་ཞུ་བྱས་ཡོད། སྔར་ཡོད་ཀྱི་ཚོགས་མི་རྣམས་ཀྱིས་བརྟན་བཞུགས་འབུལ་བར་འབྲེལ་ཡོད་ཀྱི་ནུས་པ་དང་། ཉམས་མྱོང་། དམིགས་བསལ་གྱི་བསམ་ཚུལ། འབྲེལ་ལམ་ཡོད་པའི་མི་སྣ་རྣམས་ངོ་སྤྲོད་བྱས་པ་བརྒྱུད་ཁ་གསབ་བྱས་ཡོད། ཚོགས་གཙོ་ཟླ་བ་ཆོས་འཛོམས་ནི་ཚོགས་མི་ཞིག་གིས་ངོ་སྤྲོད་བྱས་པ་ལྟར། གོ་སྒྲིག་ཚོགས་ཆུང་གིས་ཁོང་ལ་ཉམས་མྱོང་དང་། ཆབ་སྲིད་ཚོགས་པ་བྱེ་བྲག་པ་དང་མ་འབྲེལ་བའི་བསམ་བློ་གུ་ཡངས། དེ་བཞིན་སེམས་ཤུགས་ཆེ་བའི་ལས་ཀའི་བྱེད་སྟངས་བཅས་ལ་ངོས་འཛིན་བྱས་ཏེ་ཐེངས་འདིའི་གཞོན་སྐྱེས་བརྟན་བཞུགས་ཚོགས་ཆུང་གི་ཚོགས་གཙོར་བསྐོ་གཞག་བྱས་པ་ཡིན།

ད་རེས་གཞོན་སྐྱེས་ཀྱི་བརྟན་བཞུགས་ནང་ལོ་ ༤༥ སོན་པ་གཞོན་སྐྱེས་ལ་རྩིས་དགོས་དོན་གང་ཡིན་ནམ།

སྤྱིར་བཏང་འཛམ་གླིང་ཡོངས་ལ་ལོ་ ༡༥ ནས་ ༢༥ བར་སོན་པ་ལ་གཞོན་སྐྱེས་རྩིས་ཀྱི་ཡོད་ཀྱང་། ད་རེས་ཀྱི་གཞོན་སྐྱེས་བརྟན་བཞུགས་དང་དུས་སྟོན་ཆེད་ལོ་ ༡༥ ནས་ ༤༥ བར་སོན་པ་ལ་གཞོན་སྐྱེས་རྩིས་དགོས་དོན་རྒྱུ་མཚན་གལ་ཆེན་ཁ་ཤས་ཡོད་པ་ནི།
༡ ཚང་མ་ཚུད་ཐབས་དང་། རྒྱ་ཆེ་ས་ནས་གོ་རྟོགས་སྤེལ་ཐབས་ལ་དམིགས་པ།

བོད་མིའི་མི་འབོར་གྱི་གནས་སྟངས་ལ་གཞིགས་ནས་ང་ཚོས་བོད་མི་གང་མང་ལས་རིམ་འདིའི་ནང་འཛུལ་ཞུགས་ཐུབ་ཐབས་ཀྱི་དམིགས་ཡུལ་བཟུང་ཡོད། མི་གང་མང་མཉམ་ཞུགས་ཐུབ་པའི་དགེ་མཚན་ཡོད་པ་ཙམ་མ་ཟད། ང་ཚོ་ཐུན་མོང་གི་དམིགས་ཡུལ་དང་བསྒྲུབ་བྱ་ཁག་སྤྱི་ཚོགས་ནང་གོ་རྟོགས་རྒྱ་ཆེར་སྤེལ་ཐུབ་པའི་དགེ་མཚན་ཡང་ཡོད།

༢ རིག་གཞུང་སྲུང་སྐྱོབ་ཀྱི་གལ་གནད།

ནམ་རྒྱུན་ལོ་ ༤༥ ནང་ཚུད་བྱིས་པ་གསོ་སྐྱོང་བྱེད་མཁན་གྱི་ཕ་མ་ལོ་གཞོན་ཚང་མ་ཚུད་ཀྱི་ཡོད་ཅིང་། ཕ་མ་དེ་དག་ནི་བོད་མིའི་ཐུན་མིན་སྐད་ཡིག་དང་རིག་གཞུང་གོམས་སྲོལ་བཅས་ལ་མི་རབས་གཞོན་པ་ཚོར་རྩིས་སྤྲོད་བྱེད་མཁན་གྱི་མི་སྣ་གཙོ་བོའི་ཁོངས་ཚུད་ཀྱི་ཡོད་པས། ཁོ་ཚོས་ལས་རིམ་འདིའི་ནང་མཉམ་ཞུགས་བྱེད་ཐུབ་ན་བོད་མིའི་ངོ་བོ་སྲུང་སྐྱོབ་དང་། རིག་གཞུང་མི་ཉམས་རྒྱུན་འཛིན་གྱི་བྱ་བར་ནུས་སྟོབས་བྱིན་གྱི་ཡོད། 

གཞོན་སྐྱེས་ ཞེས་པ་དེ་ལྟར་འགྲེལ་བརྗོད་ཞུས་པ་བརྒྱུད་ང་ཚོས་རྒྱ་ཆེ་ས་ནས་མཉམ་ཞུགས་བྱེད་མཁན་མང་བ་ཡོང་ཐབས་དང་། བོད་མི་རིགས་ཀྱི་སྐད་ཡིག་དང་རིག་གཞུང་གོམས་སྲོལ་བཅས་པ་སྲུང་སྐྱོབ་བྱེད་རྒྱུར་རམ་འདེགས་ཞུ་ཐུབ་པ་ཡོང་གི་ཡོད། 

V-TAG འམ་དང་བླངས་བོད་དོན་ཞུ་གཏུག་རུ་ཁག་སོགས་བོད་མིའི་ཚོགས་པ་གཞན་གྱི་སྐུ་ཚབ་མེད་པའི་རྒྱུ་མཚན་གང་ཡིན་ནམ།

ན་གཞོན་གྱི་བརྟན་བཞུགས་ལས་འགུལ་འདི་ནི་རང་དབང་དད་མོས་གཙང་མས་སྒྲིག་འཛུགས་ཆགས་པ་ལས་ཆབ་སྲིད་ཀྱི་ངོ་བོ་དང་ཆབ་སྲིད་ཀྱི་ལྟ་གྲུབ་དང་འབྲེལ་བ་གང་ཡང་མེད། ན་གཞོན་མི་སྣའི་བརྟན་བཞུགས་གོ་སྒྲིག་ཚོགས་ཆུང་འདི་ནི་༧གོང་ས་མཆོག་གི་དགོངས་པ་བཞིན་སྤྱི་ཚོགས་སྣེ་ཁྲིད་པའི་ལས་འགུལ་བ་དང་། རྒྱལ་སྤྱིའི་རང་བཞིན་ལྡན་པའི་མི་སྣ་ལས་གྲུབ་པའི་སྤྱི་ཚོགས་ཀྱིས་སྣེ་ཁྲིད་པའི་མི་སྣ་ལས་གྲུབ་པའི་སྤྱི་ཚོགས་ལས་འགུལ་ཞིག་ཡིན། ཚོགས་ཆུང་འདིའི་ནང་བཙན་བྱོལ་བོད་མིའི་སྒྲིག་འཛུགས་ཀྱི་སྲི་ཞུ་བ་དང་། དེ་བཞིན་དང་བླངས་བོད་དོན་ཞུ་གཏུག་གི་རུ་ཁག་སོགས་ལ་དམིགས་བསལ་གདན་ཞུ་བྱས་མེད་ཀྱང་ན་གཞོན་མང་བའི་བོད་མིའི་ཚོགས་པ་ཆེ་ཁག་ཚང་མའི་མི་སྣ་བརྟན་བཞུགས་ཀྱི་སྲི་ཞུ་འདིའི་ནང་མཉམ་ཞུགས་གནང་རྒྱུར་དགའ་བསུ་ཞུ་གི་ཡོད།

གོ་སྒྲིག་ཚོགས་ཆུང་གིས་རང་བཙན་དང་དབུ་མའི་ལམ་གྱི་ཐོག་ལངས་ཕྱོགས་གཉིས་ལ་ལྟ་སྟངས་གང་ཡིན་ནམ།

བརྟན་བཞུགས་ནི་ཆོས་ཕྱོགས་ཀྱི་བྱེད་སྒོ་ཞིག་ཡིན་པ་ལས་ཆབ་སྲིད་ལས་འགུལ་དང་ཐད་ཀར་འབྲེལ་བ་མེད། ན་གཞོན་བརྟན་བཞུགས་འདི་ནི་ཡོངས་འདུས་རང་བཞིན་ལ་དམིགས་ཡོད་པས་ང་ཚོས་རང་རེའི་སྤྱི་ཚོགས་ནང་གི་བསམ་ཚུལ་འདྲ་མིན་མཚོན་པའི་བོད་ཀྱི་ན་གཞོན་ཚང་མ་ཚུད་པར་བྱས་ཡོད། བརྟན་བཞུགས་འདིའི་དམིགས་ཡུལ་ནི་༸གོང་ས་མཆོག་གི་བཀའ་སློབ་རྣམས་ང་ཚོས་ལག་བསྟར་ཞུ་རྒྱུའི་དམ་བཅའ་འབུལ་རྒྱུ་དང་། དེ་བཞིན་རང་ཉིད་མི་སྒེར་ཙམ་མིན་པར་འགྲོ་བ་མིའི་བཟང་སྤྱོད་གཞིར་བཞག་གིས་སྤྱི་ཚོགས་གོང་འཕེལ་གྱི་ལས་འགུལ་སྤེལ་རྒྱུར་བློ་གྲོས་གོང་སྤེལ་གཏོང་རྒྱུའི་ཆེད་དུ་ཡིན་། ང་ཚོས་ཆོས་ཕྱོགས་ཀྱི་བྱེད་སྒོ་འདི་བརྒྱུད་བོད་མིའི་ཆིག་སྒྲིལ་དང་བོད་ཀྱི་རིག་གཞུང་སྲུང་སྐྱོབ་ལམ་ནས་བོད་དོན་གོང་འཕེལ་གཏོང་བའི་ཆེད་མཉམ་ལས་བྱེད་རྒྱུ་དམིགས་ཡུལ་དུ་བཟུང་ཡོད་པར་བརྟེན་རང་བཙན་དང་དབུ་མའི་ལམ་གྱི་རྩོད་གླེང་ལྟ་བུའི་མི་སྒེར་བྱེ་བྲག་པ་དང་ལྟ་གྲུབ་ལྡན་པའི་སྒྲིག་འཛུགས་བྱེ་བྲག་པའི་ཆབ་སྲིད་ལངས་ཕྱོགས་ཁག་ཆོས་ཕྱོགས་ཀྱི་ལས་དོན་འདིའི་ནང་མི་དགོས་པར་ང་ཚོས་ཆབ་སྲིད་ཀྱི་ལངས་ཕྱོགས་གང་ཡང་བཟུང་མེད།

གོ་སྒྲིག་ཚོགས་ཆུང་ལ་མ་དངུལ་སུས་གནང་གི་ཡོད་དམ།

ད་ལྟའི་ཆར་གོ་སྒྲིག་ཚོགས་ཆུང་ལ་མ་དངུལ་གང་ཡང་མེད། འདི་ནི་དང་བླངས་ཀྱི་ལས་འགུལ་ཞིག་ཡིན། ང་ཚོས་གཤམ་གསལ་ལས་དོན་ཁག་གི་ཆེད་དུ་ཞལ་འདེབས་བསྡུ་སྔོང་ཞུ་རྒྱུ་ཡིན།

༡། བརྟན་བཞུགས་དངོས་གཞིའི་སྐབས་སུ་༧གོང་ས་མཆོག་ལ་འབུལ་རྒྱུའི་འབུལ་མཚོན་རིགས་གསར་མངགས་བྱེད་རྒྱུ།

 ༢། བརྟན་བཞུགས་ཀྱི་འཛིན་སྐྱོང་། དེའི་ནང་དུ་སློབ་ཡོན་མ་དངུལ། སྐྱེལ་འདྲེན། དྲ་ཚིགས་དོ་དམ། མཆོད་རྫས། སྒྲ་བརྙན་གྱི་ཡོ་བྱད་སོགས་ཚུད་ཡོད།

༣། ན་གཞོན་དུས་སྟོན། – བོད་ཀྱི་རིག་གཞུང་དང་ན་གཞོན་གྱི་གྲུབ་འབྲས་ལ་སྲུང་བརྩི་ཞུ་བའི་མཉམ་འབྲེལ་གྱི་མཛད་སྒོ་ཞིག་དང་། བོད་མིའི་དེང་རབས་ཀྱི་ངོ་བོ་མཚོན་ཐབས་དང་སྤྱི་ཚོགས་ཀྱི་དཀའ་ངལ།  མ་འོངས་པའི་གོ་སྐབས་སོགས་ཀྱི་སྐོར་གྲོས་བསྡུར་བྱེད་རྒྱུ་ཡིན།

ངས་ན་གཞོན་བརྟན་བཞུགས་ནང་ཇི་ལྟར་མཉམ་ཞུགས་བྱེད་ཐུབ་བམ།

ཁྱེད་ཀྱིས་བརྒྱུད་ལམ་སྣ་མང་གི་ཐོག་ནས་ཐེངས་འདིའི་བརྟན་བཞུགས་ནང་འཛུལ་ཞུགས་བྱེད་ཐུབ།  

༡། བརྟན་བཞུགས་ཀྱི་འབུལ་དངོས་དང་། བརྟན་བཞུགས་ཀྱི་འཛིན་སྐྱོང་(ན་གཞོན་བརྟན་བཞུགས་ཀྱི་སློབ་ཡོན་ཚུད་པ)། ཡང་ན་བོད་ཀྱི་ན་གཞོན་དུས་སྟོན་ལ་ཞལ་འདེབས་གནང་རྒྱུ།

༢། ཚོགས་ཆུང་ཚན་པ་ཁག་གི་ནང་སོ་སོའི་འཇོན་ཐང་དང་དུས་ཚོད་བཏང་སྟེ་དང་བླངས་ཞབས་ཞུ་བསྒྲུབ་རྒྱུ།

༣། བརྟན་བཞུགས་ཀྱི་མཛད་སྒོ་དང་། ཡང་ན་བོད་ཀྱི་ན་གཞོན་དུས་སྟོན་སྐབས་དང་བླངས་པ་བྱེད་རྒྱུ།

༤། བརྟན་བཞུགས་དང་བོད་ཀྱི་ན་གཞོན་དུས་སྟོན་ལ་མཉམ་ཞུགས་བྱ་རྒྱུ།

བོད་མི་མིན་ན་ལས་འགུལ་འདིར་མཉམ་ཞུགས་བྱེད་ཆོག་གམ།

གཞོན་སྐྱེས་ཀྱི་བརྟན་བཞུགས་འདི་ནི་ཉེ་རབས་ཀྱི་ལོ་རྒྱུས་ཐོག་གི་དམིགས་བསལ་གྱི་ལས་འགུལ་ཞིག་ཡིན་པས། བོད་རིགས་ཁོ་ནར་དམིགས་པ་ཞིག་ཡིན། འོན་ཀྱང་ཁྱེད་ཀྱིས་མང་ཚོགས་ཀྱི་བརྟན་བཞུགས་དང་གཞོན་སྐྱེས་དུས་སྟོན་གྱི་མཛད་སྒོ་ཁག་ལ་མཉམ་ཞུགས་གནང་ཆོག་པར་མ་ཟད། འཛིན་སྐྱོང་དང་། སློབ་ཡོན། དུས་སྟོན་གྱི་མ་དངུལ་བཅས་ལ་ཞལ་འདེབས་གནང་ཆོག་པ་དང་། མཛད་སྒོའི་སྐབས་དང་བླངས་པའི་ཞབས་ཞུ་གནང་ཆོག་པ་ཡིན།

གོ་སྒྲིག་ཚོགས་ཆུང་ནང་བོད་ནང་ནས་སྐུ་ཚབ་མེད་པའི་རྒྱུ་མཚན་གང་ཡིན་ནམ། 

༸གོང་ས་༸སྐྱབས་མགོན་ཆེན་པོ་མཆོག་དང་འབྲེལ་བ་ཡོད་པའི་གནད་དོན་ལ་བརྟེན་ནས་བོད་ནང་གི་མི་སྒེར་དང་ཁོང་ཚོའི་ནང་མི་རྣམས་དཀའ་སྡུག་ཆེན་པོ་མྱོང་སྲིད་པས། ང་ཚོས་གོ་སྒྲིག་ཚོགས་ཆུང་ནང་བོད་ནང་གི་སྐུ་ཚབ་བཞག་མེད། ཡིན་ནའང་བོད་ནས་སྐྱེས་ཤིང་བྱེས་ནས་འཚར་ལོངས་བྱུང་བའི་ཚོགས་མི་ཡོད། ང་ཚོས་གང་ཐུབ་ཅི་ཐུབ་ཀྱིས་བོད་ནང་གི་གཞོན་སྐྱེས་རྣམས་དང་འབྲེལ་བ་བྱས་ཏེ་བོད་ཀྱི་གཞོན་སྐྱེས་ཡོངས་ཀྱི་སེམས་ཁོངས་ནས་བརྟན་བཞུགས་ཐོག་དད་འདུན་གྱི་ནུས་པ་མ་ལུས་པ་སྤུངས་ཐབས་འབད་ཐབས་བྱ་རྒྱུ་ཡིན།

ཐའེ་ཝན་དང་བོད་མི་གནས་སྡོད་བྱེད་སའི་ས་ཁུལ་གཞན་ནས་གོ་སྒྲིག་ཚོགས་ཆུང་ནང་སྐུ་ཚབ་མེད་པའི་རྒྱུ་མཚན་གང་ཡིན་ནམ།

གོ་སྒྲིག་ཚོགས་ཆུང་གི་ཚད་གཞི་ཚད་ལྡན་ཞིག་གི་ཆེད་དུ་མི་འགྲོའི་གྲངས་འབོར་ཚད་བཀག་ཡོད་པས། ཚང་མའི་སྐུ་ཚབ་འཇོག་རྒྱུར་དཀའ་ངལ་འཕྲད་ཡོད། འོན་ཀྱང་ང་ཚོས་ཚོགས་ཆུང་ཚན་ཁག་གསར་འཛུགས་སྐབས། སྐུ་ཚབ་ཉུང་བའི་ས་ཁུལ་ནས་འོས་འཚམས་ཀྱི་ཤེས་ཡོན་དང་ནུས་པ་ལྡན་པའི་སྐུ་ཚབ་རྣམས་ལ་དམིགས་བསལ་གྱི་གོ་སྐབས་སྤྲོད་རྒྱུ་ཡིན།

བོད་མིའི་སྒྲིག་འཛུགས་དང་། དཔལ་ལྡན་དགའ་ལྡན་ཕོ་བྲང་། དེ་བཞིན་སྒྲིག་འཛུགས་ཆེ་ཁག་གཞན་ནས་ཆོག་མཆན་ཞུས་ཡོད་དམ།  

བརྟན་བཞུགས་ནི་བླ་མ་དང་དགེ་རྒན་ལ་སྐུ་ཚེའི་བརྟན་བཞུགས་གསོལ་འདེབས་ཞུ་བའི་ཆོས་ཕྱོགས་ཀྱི་ཆོ་ག་ཞིག་ཡིན་པར་བརྟེན། ང་ཚོས་དཔལ་ལྡན་དགའ་ལྡན་ཕོ་བྲང་ཡིག་ཚང་ལ་སྙན་ཞུ་ཕུལ་བ་ལྟར་བཀའ་ཁྲོལ་ཐོབ་ཡོད་པར་མ་ཟད།  ང་ཚོས་དགའ་ལྡན་ཕོ་བྲང་ལས་ཁུངས་སུ་བརྟན་བཞུགས་འབུལ་རྒྱུའི་སྙན་ཞུ་རྒྱུས་མཚོན་གནང་སྒོ་ཁག་སྲོལ་རྒྱུན་གྱི་ལམ་སྲོལ་ལྟར་གནང་ཡོད།

ང་ལོ་ཚད་ཀྱི་ཁྱབ་ཁོངས་ནས་བརྒལ་ཡོད་ན། བརྟན་བཞུགས་ཀྱི་ལས་རིམ་དང་བྱེད་སྒོ་ཁག་ནང་མཉམ་ཞུགས་བྱེད་ཆོག་གམ།

ཆོག་གི་རེད། ཁྱེད་ཀྱིས་གཤམ་གསལ་ལྟར་མཉམ་ཞུགས་གནང་ཆོག་པ་ཡིན།

༡། འཛིན་སྐྱོང་དང་། སློབ་ཡོན། གཞོན་སྐྱེས་དུས་སྟོན་གྱི་མ་དངུལ་བཅས་ལ་ཞལ་འདེབས་གནང་བ།

༢། བརྟན་བཞུགས་དང་གཞོན་སྐྱེས་དུས་སྟོན་གྱི་མང་ཚོགས་ཀྱི་མཛད་སྒོ་ཁག་ལ་མཉམ་ཞུགས་གནང་བ།

༣། མཛད་སྒོའི་སྐབས་དང་བླངས་པའི་ཞབས་ཞུ་གནང་བ།